因為我嘅職業關係，每日都要喺好短時間之內寫好文章，但係今次足足十幾日時間我都寫唔到出嚟。因為同爸爸相處嘅三十年時間入面，實在有太多太多片段。

爸爸係客家人，細個就因為政局動盪，同屋企人由大埔縣鄉下搬咗去廣州，後來轉折之下又去澳門住，中學時期爸爸就喺澳門渡過，佢亦都係當時領洗成為天主教徒。因為教會幫忙，令屋企環境略有改善，所以爸爸好積極參與教會事務，仲因為咁爭少少就做咗神父。好在有一次跟神父去殮房為過身嘅教友做彌撒，比成排遺體嚇親先縮沙。如果唔係都唔會有今時今日嘅我同兩個細佬出現。

後來爸爸同屋企人一齊移居香港，伯父慷慨將讀書機會比咗爸爸，所以佢好努力好努力，最後喺珠海書院獲得文史碩士學位，畢業成績仲係台灣大學博士班備取第一名。

畢業之後爸爸有打算過做會計、有同學介紹佢做記者，最特別係爸爸爭啲做咗明星。因為阿嫲唔比，所以冇動筆簽約，唔係爸爸可能一早已經成為邵氏國語片時代嘅紅星。

後來爸爸都係決定「誤人子弟」，但係修讀師範課程之後一路註冊唔到成為教師，經爺爺託人明查暗訪之後，原來殖民地政府覺得爸爸有可能係左派嘅無間道。後尾再經過一段時間，爸爸先可以正式成為老師。

大家印象入面，爸爸可能都係比較嚴肅嘅老師，但係其實爸爸好外向。成為藍Sir之後呢幾十年，真係可以話桃李滿天下，學生行行出狀元，據我所知已經有則師、有警隊高層、有記者、有政黨新星，等等等等。藍Sir教中文、倫理，又教過經濟與公共事務，仲做教練帶籃球隊比賽，唔知係咪嫌我冇女朋友，仲試過叫我同女子隊一齊練波。

藍Sir除咗教書，我估最重要一點係佢都教學生點做人，而唔係講完書就算咁簡單，我諗呢個亦都係咁多學生賞面嚟嘅原因。藍Sir又從來都寧願比人麻煩，都唔想去麻煩人，又可能因為咁，所以咁多老師都同爸爸成為老友。

爸爸完全唔介意幫人，佢能力範圍之內，幫得到同值得幫佢都會義不容辭盡全力去幫忙。所以慢慢，學生、同事都由叫藍Sir改口叫藍爺，除咗因為年齡上增長而升級之外，最可能都係因為佢嘅性格實在太樂意同擅於去照顧同幫人。無論係屋企人、我嘅朋友定係佢嘅同事、學生，佢都一視同仁。

我諗，我喺爸爸身上學到最重要嘅，亦都係對人好。我可能遺傳唔到爸爸讀書咁叻同咁勤力，但係我可以好驕傲咁講，我遺傳到佢鍾意幫人同不問回報去盡全力照顧人呢樣嘢。曾經有同事咁樣形容我，佢話肥仔，我送十個字比你：「天地有正氣，誠實豆沙包」。

當時我並唔覺得呢個係一個讚美，因為喺傳媒行業，太誠實唔能夠令你稱職咁完成任務。但係後來我發現，呢個稱讚係由爸爸遺傳比我，而我亦都覺得呢個係爸爸比我嘅最大禮物。

爸爸彌留時叮囑我哋三兄弟幾要做好人，唔可以做壞人。呢句說話我想同所有人一齊分享，因為我覺得呢個係爸爸教學同埋人生之中嘅終極目標，讀書成績好壞唔等同可以代表人格本身，財富多少亦唔等同於快樂多寡，希望大家都可以盡力去實踐，做一個愛人如己嘅好人。

最後除咗要多謝爸爸恩賜我咁豐富嘅30年人生、感激大家陪爸爸一齊經過人生最後一段之外，亦都希望大家定期做身體檢查，防患未燃，祝大家身體健康。